韓國女星宋慧喬同男歌手Rain所合演嘅韓劇《浪漫滿屋》喺韓國收視爆燈，連續三集都錄得超過百分之三十嘅收視率，除咗令到佢哋人氣勁升之外，連劇中嘅螢幕情侶形象都一樣深入民心。最近喺一個韓國網站嘅選舉度，佢哋就成為網友心目中「結婚之後最幸福戀人」嘅第一名。
韓國一個娛樂網站喺上月尾搞咗個名為「結婚之後最幸福戀人」嘅選舉，總共約三千名網友投票，而超過三分一嘅網友投票畀《浪漫滿屋》扮情侶嘅宋慧喬同Rain，證明佢哋呢一對係幾咁受韓國fans歡迎。第二名就係韓劇《巴黎的戀人》嘅金晶銀同朴申陽，而第三嘅就係《嫂嫂十九歲》嘅金在元同鄭多彬。
另外，喬妹喺《浪漫滿屋》度係為錢而同Rain結婚，所以Rain冇錫住喬妹，一時叫佢打掃，一時又喝佢煮飯，搞到喬妹成個女傭咁款。早前喬妹就忍唔住喺劇集嘅網頁上大叫辛苦，重話覺得自己似出嫁學做家務多過似拍戲喎。