未曾投票，選舉條例經已亂晒龍。個政府一面猛咁播出宣傳聲帶叫人踴躍投票，另一方面就用各種畸形方式壓制選舉氣氛，例如電台要設立「選舉冷靜期」，又要求候選人喺電台拉票只可以叫市民「支持」自己，唔准叫人投自己一票。
乜嘢叫「選舉冷靜期」？各大報刊要唔要積極配合？想選舉冷靜啲，係咪三月份嗰陣就應該謾罵少兩句「漢奸」同「港獨」？候選人出街派單張拉票，電視新聞轉播，播幾耐先至叫熱情，播幾短至叫冷靜？
重有啲電台節目，規定唔准提候選人個名，一提親就要個個都提。例如喺《風波裡的茶杯》，一講到「曾經被辱罵為漢奸嘅李柱銘」，為咗平衡，係咪應該個個候選人個名都加番漢奸兩個字，位位嗌勻，咁先叫做「平衡」？一個選區有幾十個候選人，個個名都叫勻，要佔用幾多分秒大氣電波，係咪提呢個唔嗌嗰個，就變咗偏心？
均衡提及候選人芳名，呢一樣只適合用喺單議席單票數嘅細選區。以前全港分十八區，每區有三四個候選人，喺一個半小時嘅節目裏面，個個名嗌勻，清楚易記。𠵱家分五大選區，區區幾十條名單幾百人，用個腦稍為諗吓就知道好反智。但胡國興大法官好少理，揸住一本通勝睇到老，唔准就係唔准，結果搞到電台怕晒投訴，主持人惟有當候選人全部冇到。一個名都唔提，就一定唔會俾選委會同廣管局亂叉。齊齊唔提名，選民對候選人何來有認識，加埋代議制選舉方式凌亂，七八成選民都話唔知點樣配票。
候選人喺電子傳媒冇晒空間，惟有借助其他傳媒宣傳。大班血戰俞琤，賣足三四日頭版，大班慳咗幾百萬頭版廣告費。馬力患結腸癌，又佔一大版。范徐麗泰老公患癌、陳婉嫻割乳癌，全部都有位上。以後立法會選舉經費，要由癌症基金會資助至得嘞。
呢個政府究竟想人投多啲票定係唔投？投票意願高漲，七成幾人話會投票，投票率高即是益晒民主黨，加埋解放軍閱兵，原來係同民主派助選，因為市民覺得中港有溝通，民主黨不辱使命。一場選戰，搞到好似泥漿摔角，真係該煨。
傳真︰2623-9278
電郵︰