喺星期三當舒爾本主場迎戰西班牙嘅拉科魯尼亞時，會創歷史成為歷來首支喺歐冠盃第三圈外圍賽亮相嘅愛爾蘭球隊，證明歐冠盃唔單止係強隊嘅天下。
不過，舒爾本要喺星期三呢場波再創造爆冷戰果，就機會唔係咁大。點解我求大俠咁講？除咗因為拉科實力強之外，咪因為呢場波係創造歷史之戰，搞到成個愛爾蘭嘅球迷都撲飛，於是有關方面決定將呢場波由舒爾本可以容納九千五百人嘅主場，搬去可以坐二萬四千人嘅愛爾蘭國家隊主場蘭斯當路球場舉行。踢慣細場嘅舒爾本冇咗主場之利，反而益咗踢慣大場嘅拉科。
不過，無論如何，舒爾本淨係喺呢場比賽都會執成一百萬歐元（約九百八十萬港元），加埋多咗咁多曝光率同知名度，相信舒爾本一早已經係大贏家啦！
挪威前鋒蘇斯查因膝傷幾可肯定今季成季打唔到，甚至提早收山；曼聯早前公布嘅歐冠盃大軍冧巴，就冇咗蘇斯查，可見佢哋打定輸數。近屆喺曼聯效力嘅北歐球員，除丹麥門將舒米高外，其餘挪威中堅朗尼莊臣同瑞典翼鋒布隆基斯都係膝頭有事，睇嚟曼聯同北歐球員相沖相剋。
阿仙奴日前影咗今屆全家福，有可能過檔皇馬嘅中場兼隊長韋拉就坐咗喺領隊雲格隔籬，但阿仙奴躉咪開心住，事關之前史譚同艾巴影咗全家福，照樣俾曼聯同拜仁賣走。韋拉被傳過皇馬單嘢講咗成個月，連皇馬前鋒朗拿度都頂韋拉唔住，叫佢爽快決定，咪想死唔想死咁。
西布朗前鋒李爾曉士因飲酒撞死人而被判坐監六年，引起好大迴響，西布朗立即同佢終止合約，職業球員公會行政總監哥頓泰萊亦出嚟話會對會員加強教育，等佢哋明白超速、飲酒同埋用藥嘅危險性，泰萊重話會為年輕球員特設高級駕駛測試，確保佢哋應付到駕駛大馬力嘅車！
意足總日前披露十二間球會（包括基爾禾、錫耶納、摩德納同安科納等）職球員牽涉假波案，意乙被迫推遲到「九一二」，即係同意甲一齊開波。事件牽連甚廣，錫耶納會長迪路卡（圖）就話如果球員打假波可以咁逼真，全部可以攞奧斯卡。即管睇吓意球壇係咪咁多人鍾意「演戲」。