上個禮拜蘭西提到，有個二十歲仔，用九成半按揭，買上水中心，噚日收到另一單料，年紀重細。
中記郭同章話，買家係女會計，做咗一年嘢，因為有九成半按揭至夠首期，買入粉嶺中心K座中層4室，近四百七呎，作價九十三萬五，首期唔使四萬七。還款年期二十五年，息率最優惠利率減二厘五至二厘六，月供唔使四千，佔佢月入四成。
郭同章話，呢區搵樓人士中，年輕人急增至佔逾兩成半，一兩周前只不過三至五巴仙。
粉嶺中心今個月有七宗成交，三成用九成半按揭。
建築師學會及測量師學會等多個專業團體，聯合主辦的04年優質建築大獎，經過兩年籌備及評審，有八個項目入選，住宅與非住宅各半。邊個攞到大獎，周五晚揭曉。
新地獨佔三個，包括豪宅何文田山1號、馬灣珀麗灣。以及與恒地等合作的中環摩天寫字樓國際金融中心二期。
另外，房協首個長者屋，將軍澳樂頤居，都入選。置地遮打大廈、旭日北京道一號、政府西營盤綜合大樓及公共衞生測檢中心都一同入選。
美國加唔加息，香港點做，今日揭盅，代理行計定數，發現就算加息，對樓市都冇影響。
中記話，用敏感度分析，計算加息對供樓負擔影響，指入息中位數係一萬五千八，若加息四分一厘，供樓負擔都係由二十五點四巴仙，升到二十六。中記黃良昇話，樓市其實早已消化加息因素。
近期樓市焦點非西灣河嘉亨灣莫屬，代理好重視，送出大量優惠，好似世紀21，之前夥拍工銀亞洲，向買家提供低息同埋旅遊等優惠。
如今嘉亨灣已經開賣，雖然未至於曲終人散，但揀唔到單位嘅，只好另行搵樓。世紀21就索性一橋二用，凡持有嘉亨灣入票登記，透過該行購買逾二百萬嘅二手樓，適用於嘉亨灣嘅低息同旅遊優惠，照送。
地產代理監管局上周公布話，捉到六十五宗代理違規促銷一手樓個案，噚日同五大代理商會會面，表示關注外，重提醒代理留意居屋轉讓限制。
地監局指，得悉市場上有部份居屋業主，喺未完成補地價手續前，就將單位出租或出售，懷疑有地產代理協助促成交易。
蘭西
電郵地址：
