今日係會考生放榜嘅日子，譚詠麟（阿倫）、李克勤、張達明同Boy'Z前晚就率先同二百位應屆會考生打氣。
Boy'Z嘅Steven今年係中五生，不過佢因為做咗歌手，成日唔返學，所以冇考會考，Steven話佢出年會報考，遲啲會自修或者報夜校，佢拍檔Kenny話到時會督促佢一個禮拜至少返四日學，Steven又補充話：「我好後悔冇返學，有時出trip見個個都識講英文，自己就唔識，都想學多啲嘢，雖然我冇考，但都感受到考生嘅壓力。」
阿倫講到周潤發批評母語教學單嘢，阿倫話：「母語好緊要㗎，將來中國人唔識講普通話搵唔到食，國際化亦都緊要，應該雙管齊下，因為香港人嘅中文程度的確唔及內地同星馬等地。」發仔話自己仍然學緊英文，阿倫就話：「我都與時並進，學緊『法』文，發噏風嗰隻文呀，我去到高級博士文憑。」
下個月十二號係張國榮（哥哥）嘅生忌，佢班歌迷為咗延續偶像嘅精神，成立咗「繼續.張國榮藝術工程」，而早排有歌迷就同中國藝術剪紙協會合作，由該會會長盧雪女士親自為哥哥製作一個真人高嘅剪紙作品，喺哥哥生忌時放喺蠟像館。盧女士亦會再做多約五十個哥哥嘅《霸王別姬》造型剪紙，希望完成後可以做國際巡迴展覽。
何超儀噚日到尖沙嘴擔任香港城市橋牌錦標賽嘅頒獎嘉賓，佢話九月會為電影《蝴蝶》參加威尼斯影展，佢話：「我去埋威尼斯影展，就三大影展都去晒，係我人生嘅大事。」對於陳慶嘉想搵佢去日本拍新戲，要佢飾演靠皮肉維生嘅學生，重要同日本男藝人合作，超儀話：「如果係淺野忠信，少啲錢都冇所謂。」
台灣名模林志玲做咗唐安麒瘦身廣告代言人三年，上圍由BCup升到CCup，大腿同手臂都幼咗，於是近日台灣方面就質疑佢裝假狗，又話佢被挑選做代言人時，要全裸俾人鑑定身材真假。林志玲噚日為代言嘅汽車品牌拍廣告時，話自己身材從來冇變，亦冇全裸驗身，佢重透露自己豐胸嘅方法係飲生雞蛋溝豆漿。
薛凱琪（Fiona）前晚同周國賢去睇電影《加菲貓》，佢同隻真人扮嘅加菲貓影合照時就好避忌，加菲貓攬住Fiona時，佢都好似好抗拒同好驚咁，重即時以手護胸，Fiona話：「我唔係怕，佢體積大，又踩咗我一腳，可能我膚色黑，撞嚟撞去咁先睇唔到我啩。」
