恒指是日波幅唔算大，只係135點，埋單跌59點。一般大藍籌高低相差亦只係1至2%。不過啲相關C輪，波幅則好大，有啲相差20%，咪講做隔夜嘢，做即市嘅做得啱已有魚有肉，做錯嘅話則可以輸到頭耷耷。
新地C輪9391：指數輪以外成交金額最勁，銀碼超過半億。最高64仙，最低54仙，波幅19%，收56仙，全日跌幅11%。正股（016）高低相差只係「四格」，每格25仙，收67.50元，跌1格，只係變動1格，隻輪就已經散咗11%。
9391喺12月中前夠鐘，溢價2.9%，槓桿率12.1倍（有效槓桿率7.7倍），引伸波幅26%。預咗正股反覆，隻輪宜用嚟炒出炒入，唔使一定過夜，挨近50仙嗰頭買入，有貨在手後見60仙以上獲利散水。
和黃C輪9780：第2大成交金額嘅藍籌C輪，最高35.5仙，最低30仙，波幅同上便新地C輪9391一樣，又係18%。呢18%嘅波幅，只係喺正股（013）1.25元高低位之內出現。
9780下月中到期，輪價32仙，溢價1.7%，槓桿率17.9倍（有效槓桿率11.6倍），引伸波幅23%。炒上落，28仙買入，34仙沽出。
富豪公司輪1011：早前正股（078）10股送1送出，出爐4日，收10仙，升32%，成為是日輪王。1011係07年7月至夠鐘，溢價30%，咁長期，溢價唔算高，但槓桿率2.7倍則唔靚。溢價30%，應該要有較大嘅槓桿率。短期內可能炒供求（發行量834球），睇耐啲，多數跑輸正股。
章盛