建築邦糾眾去睇《MammaMia》，旨在向兒子灌輸音樂意識，佢位公子就嚟參加學校合唱比賽，去睇歌劇，當然係好好嘅經驗。左丁山已經睇過，覺得好好睇，不過再睇一次星期日日場，就興致不太大，推辭咗。叫藝術B去，點知藝術B啱啱睇完雲妮侯斯頓無耐，兩公婆用咗三千二蚊買兩張飛，已經幾肉痛，因為啲藝術家唔係容易搵到個錢，你估個個都係莫奈咩。但最令藝術B氣頂嘅，唔係嘥錢，而係雲妮侯斯頓欺場，佢覺得好冇癮。話過以後逢係老牌歌星來港開演唱會，一定要諗過度過，影響所及，再用一千銀去睇《MammaMia》（兩張飛），都係咪搞住先。
藝術B話：「好多名人捧雲妮侯斯頓，我諗個個媽媽聲，不過大家都有頭有面，唔出聲而已。大小姐八點半開場，十點四收工，中間講一大輪無謂嘢，阻成半個鐘頭，唱歌又已經失去高音，顯然不在狀態或者已走下坡，再唔係以前嘅雲妮侯斯頓咯。令人失望到極。好心佢咁嘅款就唔好出來獻唱獻世啦，真係晚節不保也。」
雲妮侯斯頓唔知老唔老得過ONJ（奧莉花紐頓莊）呢？記得ONJ五十歲嗰陣，患完癌症，醫好後，來港演唱，又唱又跳兩個多小時，夠晒勁，吳光正都拍爛手掌。雲妮就吞pot咯，敗壞自己名聲，兼夾害親主辦機構，想落有時邀請大牌過氣歌星來港，風險好高，唔係人人咁有專業道德也。
《MammaMia》係群戲，靠整體合唱合作取勝，實在好好睇，學生都睇得明，如果未睇過，領略吓啲經驗，感覺都幾好。