劉德華月底在紅館開騷，屆時其舞台將設有可升高二十米的升降台，然而紅館方面只批准升高十五米，以免頂着天花器材，最後監製決定讓華仔升至十米，與山頂歌迷拉近距離，但他在日本試坐時已嚇到腳軟。
劉德華將於本月底在紅館舉行十五場演唱會，屆時他將使用日本清水舞台，台上設有升降台，可將他升高二十米，與山頂觀眾拉近距離，但紅館方面看過圖則後表示只准華仔升至十五米。
華仔說：「我覺得次次做演唱會都同山頂觀眾相隔好遠，有時好想近啲見吓佢哋，如果升得唔夠高，我寧願唔升，好彩最後監製畀我升到去十米，差唔多去到第二十行觀眾席左右，再升就頂住燈架。」
由於升降台上沒有安全帶等裝備，故大會為華仔買下三千萬元保險，他說：「我之前喺日本試機時，雖然個升降台冇安全帶，載我上去之後重有個小舞台，啱啱夠我一個人坐低咁大，到時我可以亂郁亂爬都冇問題。當時我上到去一啲都唔驚，點知升到去屋頂，有工作人員喺下面叫，我低頭一望，即時嚇到腳軟，我諗我要試多幾次習慣吓，費事驚到影響唱歌。」
另外，華仔完成香港個唱後，下月中將展開內地巡迴演唱會，包括北京、上海、蘇州、天津及哈爾濱等十個地方，昨日華仔在上海舉行巡迴個唱記者會，吸引逾三百傳媒採訪。
華仔表示今次選擇未演出過的地方開騷，當有人知道他會去哈爾濱後，竟勸他不要去，因當地歌迷非常瘋狂，華仔以國語說：「這最好，我最怕歌迷靜。」問他對蘇州有何印象？他說：「聽說蘇州多美女，劉嘉玲就是最佳出品，希望屆時眾美女歌迷坐後一點，我怕我見到她們會分心呀！」
下月二十七日便四十三歲生日的華仔表示，因工作關係只能放三日假，屆時他會狂打保齡慶祝，他說：「我為咗演唱會，要個幾月冇得掂保齡球呀！」
