考評局秘書長蔡熾昌（圖）兩星期後就夠鐘退休，噚日主持埋最後一次中學會考放榜記者會就功成身退，會後蔡熾昌同記者閒聊，講自己退休後大計，佢話希望花多啲時間睇書，又想搵機會去黃山、張家界旅行，佢笑言要趁後生重行得走得多欣賞大江南北風光，有行家笑佢咁後生就退休，蔡生話全靠太太靚湯至駐顏有術。
蔡熾昌無官一身輕，講番過去幾年考評局連番發生失試卷、出錯卷等問題，蔡生話自己問心無愧，盡力而為，亦好懷念同事上下一心，同甘共苦嘅日子，又話以後打風落雨都有覺好瞓，因為唔使擔心天氣影響考試安排，至於任內成績，蔡生話做人唔係求分數，至於有冇人向佢招手下海，佢唔否認，但亦冇透露任何蛛絲馬跡。
噚日大學聯招放榜，蔡生個仔係應屆高考生，噚日亦獲通知考入港大法律系，蔡生話唔單止開心，直情係放下心頭大石，佢話個仔見到45條關注組成班大狀好英，所以想做律師為社會做事，日後更打算從政㖭。
傳真︰2623-9278
電郵︰