港股噚日持續淡靜，收報12408，跌59點，成交只有98.52億元。港股下半年的成交金額比上年明顯下降，看來港交所（388）就快要被調低評級。
今年投資收益變數較多，好似盈保（065）咁，中期業績由盈轉虧，蝕1.18億元，令股民大失所望，原來期內有一筆未變現投資虧損高達1.42億元。盈保噚日股價一度急挫近20%，其後在里昂力托下，跌幅才收窄至6.5%，收報2.85元。
兗煤（1171）早前受惠煤價急升，備受大行睇好，不過近期就頻頻傳出利淡消息。
據聞淡友在9.50元水平開始在場外累積兗煤的空倉，跟住冇耐就傳出國內擬開徵能源稅及大幅調高資源稅，令股價輾轉下跌。
噚日再傳出中央限制煤價升幅在8%之內，對兗煤嚟講係相當大件事，因為意味公司的盈利能力將受到限制，即時觸發強勁沽盤，股價一度跌至7.80元，跌幅達6.6%，歐資午後入市力接，將股價抽回8.10元收市，跌幅收窄至3%，成交則高達4.85億元。其實煤價已跟隨油價企於相當高水平，冇理由假設煤價重可以年年升8%咁恐怖。
限制煤價升幅事件反映國內的宏觀調控政策透明度不高，外資唔知幾時重有新政策出台，影響所投資的股份盈利能力，受此不明朗因素困擾，投資者將更難作投資決定，因此唔排除會掀起新一輪國企股減持浪潮，恒指噚日跌幅為0.48%，而國企指數則跌1.2%，明顯跑輸大市。
阿虎