雅典奧運本周五開幕，連會計師行都湊熱鬧，為今屆奧運做一次賽前預測。全球四大會計師行之一嘅羅兵咸永道，最近做咗一次研究，估計主辦國希臘同埋部份前蘇聯同盟國嘅攞牌機會較高。該份研究係以各國嘅人口、平均收入水平，以及歷屆獎牌數目等因素去進行評估。
該份報告估計，美國、俄羅斯、中國及德國仍然會喺今屆奧運佔據獎牌榜前列，但獎牌數目會較上屆少，其中上屆獎牌榜首嘅美國，預計會由97面大幅減至70面；中國就會由59面減至50面。而希臘作為主辦國，表現應較上屆悉尼奧運優勝，由上屆13面增至今次29面。反而澳洲就冇上屆咁威。
調查又特登研究前蘇聯同盟國，話佢哋以前喺共產主義領導下，較着重體育，雖然時移勢易，但爛船都有三斤釘，估計今年佢哋表現仍然優異，例如烏克蘭、波蘭、保加利亞、羅馬尼亞及古巴。
傳真︰2623-9278
電郵︰