繼銀行股之後，輪到地產股開始公布業績，嘉里建設（683）噚日公布截至今年6月止中期業績，成功轉虧為盈，盈利6.98億元，中期息派20仙，認真唔錯。
經紀黃話，由於嘉里業績超出市場預期，聽講分析員會將全年盈利預測同埋目標價調高。
嘉里業績靚仔，主要係受惠於上半年賣樓收益增加所致，加上再冇好似舊年同期咁作大幅撥備。下半年公司重有樓盤貨尾可賣，計落可收多超過10億元，若然投資者仍然睇好本港樓市，嘉里可列入考慮之列。
雖然嘉里業績靚仔，但股價只係抽過上去13元一陣，高位有回吐，最後收12.75元，升1.59%。
另外，經紀黃早排品題過嘅上海復地（2337），亦在噚日公布中期業績，單睇公布業績前兩日股價急跌，就估到有多少唔妥，果然中期盈利2.2億元人民幣，比舊年同期下跌8.4%。據講係受大陸宏觀調控影響。
但經紀黃死撐，話隻股起碼有中期息6仙派，唔算失禮。
慕容小初