數碼影音：<br>KonicaMinolta拉闊DCZ3長距廣角兼備

數碼影音：
KonicaMinolta拉闊DCZ3長距廣角兼備

自KonicaMinolta合併後，新機總令人有驚喜，高階機DiMAGEA2已經贏得唔少Pro友歡心，中檔級別亦有部DiMAGEZ2坐鎮，以平價及10倍光學變焦鏡頭為賣點。其後繼機Z3日前亦都粉墨登場，鏡頭進一步提升至12倍光學變焦，兼且注入CCD位移防震系統，影相唔怕鬆郁矇，但係價錢就令人心郁，開價亦只係$3,480！
記者：劉耀祥
攝影：陳偉強
ImageGirl：Dicky

細機身搭支長鏡已經係中階數碼相機嘅新標準，情況就等於當年菲林儍瓜相機，支鏡愈玩愈長。而KonicaMinolta新機DiMAGEZ3就更加用上一支12倍光學變焦鏡頭（相等於35mm相機的420mm），比起好多專業級機種更勝一籌。

■採用光學觀景窗，旁邊設有屈光掣。

■機背按鈕排位依舊，舊用家毋須重新適應。

新鏡更長更Wide
擁有12倍光學變焦的DiMAGEZ3，乃目前KonicaMinolta旗下最長距光學變焦機種。採用GT光學技術，開盡12倍光學變焦，效果依然清晰。新鏡夠長之外，廣角亦達至5.83mm（相等於35mm相機的35mm），比Z2的38mm更Wide，廣角拍攝亦未有變形情況出現。鏡頭反應相當敏捷，Zoom來Zoom去都好爽手，值得一讚。除鏡頭更長外，今次Z3更加入了以往只在A系機種上出現的「CCD位移防震系統」，利用CCD的移位，減少出現矇郁鬆相片的機會，廠方亦稱可將快門速度較慢3級，認真犀利。

■採用GT鏡頭，35-420mm焦距影遠又得影近又得。

■閃光燈GN數值達8，足夠一般用家使用。

最廣角
■全廣角拍攝，35mm足夠影晒大半個維港。

最長距
■開盡12倍變焦威力，相中細到睇唔到嘅屋仔即時拉到眼前。

精心設計勝前作
DiMAGEZ3外形上似乎與前作Z2相若，不過細心睇，就會發覺廠方於Z3上所付出的心思。首先機身兩側大幅加上防滑手膠，拎上手感覺相當穩陣。而且SD插槽由機側遷往機底，揭開獨立活門就可以換卡，比起Z2設於機側，下下要開個大蓋先可以換卡，方便度的確大大增加，不過引伸另一問題，就係配腳架影相時，會阻擋咗電池位同記憶卡位，要換起上嚟就麻煩咗。
介面操作尚算容易，扭到Setup後，就可轉換相片解像度、壓縮率、閃燈設定等數值，遇着多變嘅環境都可輕鬆應付。

■模式設定簡單，由解像度到壓縮率都好易調校。

■握手位加咗防滑膠邊，好拎得嚟賣相亦算美觀。

■轉盤前兩個按鈕位置太貼，好易㩒錯隔籬。

按掣配置易上手
除介面操控簡單外，機頂亦設有功能選擇轉盤，同Z2一樣，機背按鈕與操作介面亦與Z2相若，若果係舊用家升級換機，肯定好快可以上手。但係轉盤前的閃燈及微距掣就要彈，擺放位置與轉盤相當貼近，用落就唔夠順手喇。

■插卡位遷往機底，而且活門改細，更為方便靈活。

■採用四粒2A筆芯電，補充上方便得多。

PROFILE
感光元件：420萬像素CCD（400萬有效像素）
鏡頭：12倍光學變焦＋4倍數碼變焦
光圈：f2.8-f4.5
ISO：自動/50/100/200/400
記憶卡：SD/MMC
電池：2A×4
體積：108.5×80×83.5mm
重量：335g

KonicaMinolta　查詢電話：25652192

■Z3外形與Z2相若，繼續走細機身長鏡頭路線。$3,480