現年三十四歲嘅英國頂級名模納奧美金寶（NaomiCampbell）一向出名脾氣臭兼架子大，識佢嘅人好多都頂佢唔順，好似碧咸（DavidBeckham）老婆Victoria同黑人名模TyraBanks都同佢有牙齒印。幫佢打工嘅就更加苦不堪言，四年前佢個前助手曾入稟法院告納奧美話於九八年喺酒店俾納奧美用手機掟傷，近日納奧美嘅女傭又聲稱俾佢打到周身傷，誓要告到佢甩褲咁話。
事緣喺上周六晏晝，紐約警方接報去到納奧美位於ParkAvenue嘅寓所，知道原來佢同四十五歲嘅工人貝頓（MillicentBurton）起爭執，貝頓話納奧美打到佢塊面瘀晒同成身傷痕，而貝頓個仔重話：「佢打我阿媽個下顎，嗰度腫起晒。」據知貝頓已經搵咗律師，聲言要納奧美作出賠償。
不過有知情人士透露，佢哋爭執嘅原因係因為貝頓唔肯幫納奧美做一啲例行嘅工作，而且係先動粗嗰個，所以納奧美嘅律師已經代表佢否認有關指控，重反指貝頓郁手打人。由於雙方都先後向警方作出投訴，所以警方發言人話現階段唔會作出調查。
雖然納奧美今次又有可能要上庭，不過淨係佢告《鏡報》單侵犯私隱案都搞咗咁鬼耐，所以呢單案對佢嚟講係濕濕碎。