充完一輪電之後再次投入工作嘅妮歌潔曼（NicoleKidman），最近俾英國BBC電視台睇中，佢哋瞞住妮歌拍攝咗一輯關於佢嘅紀錄片，重以妮歌未紅之前鮮為人知嘅秘聞做噱頭㖭。
妮歌未紅之前，原來曾經為唔少MV做臨記，BBC電視台工作人員訪問到八十年代澳洲樂隊MondoRock主音RossWilson，佢堅稱妮歌十六歲嗰陣第一次參演嘅MV，就係佢哋樂隊八三年推出嘅歌曲《BopGirl》。
電視台自然會喺節目入面播放MV嘅片段啦，妮歌當年個樣同𠵱家有好大分別，佢留咗個八十年代好流行嘅獅子頭，又化埋濃妝，喺沙灘上面摸住張櫈跳舞。負責執導MV嘅導演GillianArmstrong話：「嗰陣製作費有限，我透過澳洲年輕人劇場搵到妮歌演出。」不過唔少認識妮歌嘅人都唔願出鏡，原因係妮歌唔知有咁嘅節目，怕得罪呢位金像影后。
另外，妮歌前夫湯告魯斯（TomCruise）嘅新片《Collateral——同行殺機》順利成為上周美國票房冠軍，上映三日已經大收近一億七千四百七十萬港元，不過有人話靚佬湯早排出席首映禮嗰陣有啲古怪，佢入場之後鬼鬼祟祟咁同個神秘男子坐埋一齊，其後又前後腳現身派對。另一方面，靚佬湯啱啱用二百八十萬港元喺柏林租咗三間豪華別墅，以便拍攝《職業特工隊》第三集時候入住。