馬力自稱患咗結腸癌，成為選舉小圈子熱門話題。雖然候選人患癌，喺一個土共所講嘅政治低質素社會，會好似瓊瑤啲小說女主角患咗白血病就谷一谷銷書一樣，會吸引好多感性嘅文藝選票，但無論係憎惡民建聯呢個轉軚黨、定係關心阿馬力健康嘅人士，都希望我哋愛國小馬哥早日退選。
祖國係都要督卒監人上火線同班漢奸肉搏，實在講唔過去。秦城監獄嘅反革命罪犯如王丹、王軍濤，若然發現喺獄中有屙血現象，加埋有美國政府出頭，都會嗱嗱臨保外就醫喇。阿馬力佢今次結腸癌，反為冇得保外，喺國家眼中，唔通連反革命罪犯都不如？
就算馬力哥真係挾高文藝票當選，結腸癌呢味嘢，係好手尾長，咁到時喺立法會挑燈辯論，隔一陣就要向立法會主席鞠躬請假。謝偉俊抨擊有人做咗十三年議員，係「霸住茅廁不辦公」，咁市民選咗任何一位患結腸癌嘅議員，第日霸住立法會辦公，加深咗有關人士嘅痛苦，咁就係選民最大嘅涼薄同無情。香港人係成熟嘅，亦係仁慈嘅，如果馬力哥堅持抱病參選，香港人對佢呢份熱情，人人都心領咯。
但佢所熱愛嘅共產黨係都唔准佢保外就醫，咁就要由港島區選民發揮人道精神，齊齊用選票去共同挽救馬力嘅健康，唔好令一啲咁嘅人才咁操勞。請佢返屋企休息四年，呢個就係最佳嘅雙贏。話唔定佢喺屋企閉門養病，睇多次紅樓夢會大澈大悟，看破生死，過一年半載又大力支持番○七○八普選，率領民建聯轉多一次軚，咁就係市民之福呢！
講到轉軚，民建聯百轉不厭，之不過兄弟黨港進聯就轉極都冇人要。唔單止陳婉嫻唔敢再孭住民建聯招牌出選，喺天光雞叫之前唔認耶穌，港進聯兩名黨徒參選，紛紛以「獨立身份」出選，以免俾黨陀衰。飛天朱慘遭勸退，劉漢銓又爭奪唔到黃宜弘個位，港進聯剩番曹宏威夠膽以黨徒身份出嚟參選。曹宏威係港區人大，回報祖國一向都好瞓身，早幾年老江當道，佢力竭聲嘶咁帶頭大罵法輪功，直頭做晒「愛國威而鋼」，最近胡溫上位，先至見佢收咗聲。好多老左私底下話愛國陣營內五官端正、似番個人樣嘅，買少見少，諗諗吓馬力都係唔好退選咯。
傳真︰2623-9278
電郵︰