早排消失咗嘅飛天朱朱幼麟，噚日終於蒲頭。飛天朱同八方講，如果泡沫黨港進聯爭氣，團結埋立法會內其他愛國愛港人士，例如陳智思、霍震霆、吳亮星、胡經昌同埋馬逢國，叫晒佢哋入黨，泡沫黨係可以做立法會第一大黨，𠵱家搞到俾人剝晒光豬，一個議員都冇，真係極度失敗。
但係飛天朱都算忍得，都冇叫主席劉漢銓辭職。佢淨係話，上面嗰五個人，個個唔肯入港進聯，就連啲黨員參選，都寧願潛水，唔肯掛泡沫黨個朵，銓哥就好應該反省吓，點解啲人唔肯入黨、點解訓練到啲黨員咁叻潛水？
有啲黨員重話，同銓哥開會嘥時間，同佢開會不但止收唔到料，重要聽埋銓哥風花雪月、講啲言不及義嘅說話，所以開會嘅黨員買少見少，好多黨友都不滿銓哥「賴死唔走」。
勇於接受直選考驗嘅民建聯主席馬力無端端生癌，搞到「出師未捷身先病」；反而唔肯選嘅銓哥，重精神飽滿，可以「保留實力、挑戰明天」。八方都要歎一句，真係造化弄人啦！
傳真︰2623-9278
電郵︰