噚日有地產代理向傳媒報料，話有位馬姓「高官」喺置富花園嘅祖屋放租，有一位韓國籍租客租咗。港府高官之中，姓馬嘅最高級官員，非馬時亨莫屬，八方梗要走去查吓，因為馬局長一向唔係話出身寒微、自細住板間房，乜原來佢喺置富有間祖屋嘅咩？
間屋係位於置富二十座低層嘅五百一十八呎單位，月租六千八百元，七九年以二十三萬元購入，照計當時馬局長應該重喺加拿大做分析員。一問之下，原來係「馮京作馬凉」，間屋登記業主嘅英文名同馬局長個名極相似，但就差一個英文字，si同shi，咁唔怪得啲地產代理會誤會。不過其實馬局長又同置富幾有緣份，噚日就去咗置富腳底嘅數碼港主持收支票儀式。
傳真︰2623-9278
電郵︰