嘉亨灣向隅買家李小姐向蘭西投訴，指發展商恒基，周日賣樓安排混亂，最初叫買家入票抽籤，當日又改以先到先得發售。
手持五十餘號籌嘅李小姐，周日早上十一點到售樓處，直至晚上七時先至入到揀樓處，其間懷疑遭人打尖。一眾準買家喺揀樓處與數百名經紀擠作一團，擾攘近三粒鐘，先至發覺低層園景、呎價四千餘嘅單位已經掃光，餘下可供發售單位，呎價六千以上，結果接近晚上十時，只帶着一肚子氣離開。
李小姐指摘發展商賣樓透明度極低，不公開單位售價，只透過經紀轉告個別單位售價，拉長揀樓時間。
蘭西向恒基查詢，但昨日未收到回應。
「電波少年」呢齣講述兩個港日少年，靠好少錢流浪遠方嘅真人show，喺香港播出時好哄動，其中香港少年謝超仁，𠵱家住喺東京，做咗藝人。佢最近隨日本攝製隊返港，拍一輯介紹全球貴價嘢嘅節目，豪宅梗係有份啦。
攝製隊會走訪山頂同南區花園洋房，名人同藝人居所，又搵美記羅文駒，講吓薄扶林貝沙灣及赤柱富豪海灣點解咁豪。聽講，千零萬已經可以喺日本買到花園洋房，但香港只可以買到分層。
攝製隊拍埋今日會去下一站，但謝超仁就會留港五日，順道探家人同親友。
玩具城鄭氏兄弟，旋風式大手掃貨，包括薄扶林貝沙灣十幾件，以及西灣河嘉亨灣三十幾伙，成為傳媒追訪對象。
細佬鄭躬明噚日睇樓，帶埋泰籍華僑朋友，去世界何文田君頤峰。由於事前call齊記者，喺發展商陪同下，一行二十人，參觀最貴重嘅頂層複式及會所。淨係睇樓都搞到咁大陣仗，真係少見。
佢又透露，啱啱賣出貝沙灣單位，賺百幾萬，順理成章又有得見報。
想感受花海蕩漾意境，以後唔使再長途跋涉，又搭飛機又搭車去外國睇，皆因長實東涌映灣園，會喺屋苑前方會所位置，一幅三千三呎地皮種滿油菜花，開花時一片黃澄澄嘅花海，展現眼前，夠晒賞心悅目。
映灣園位置鄰近國際機場，發展商向來標榜物業有六十一萬呎度假式會所。設計多達八十四項，今次為配合第三期悅濤軒促銷，重多花六千萬，整個兒童會所，除咗有一百米田徑賽道外，相信大片油菜花田，就大人細路都鍾意。放假，重邊使周圍去？
蘭西
電郵地址：