無綫早排裁員又cut藝員騷，搞到汪明荃（阿姐）成日唔係幾開心，話自己被公司投閒置散，重話分分鐘下一個炒嘅可能係佢。好在事後無綫總經理陳志雲同製作資源部副總監樂易玲，喺上個月約阿姐食飯嚟安撫佢，阿姐條氣先至順番晒。
其實無綫一路都想搵阿姐拍劇，但弊就弊在阿姐成日唔得閒，好多時無綫想搵佢做嘢，佢都撞晒期，加上阿姐做嘢都算幾揀擇同難服侍，啲監製咪唔敢隨便搵佢囉。
不過，馮仁昭知道無綫近日成功同阿姐傾掂數，幫阿姐度身訂做一套古裝劇《我的野蠻奶奶》，大概喺十一月左右開拍。佢喺呢套劇度飾演一個野蠻奶奶，同媳婦葉璇展開大鬥法，但扮演阿姐個仔嘅男主角就暫時未有定案。馮仁昭覺得無綫搵阿姐做呢個野蠻奶奶簡直fit到漏油，分分鐘呢套劇又再帶挈佢攞多次「女主角」獎呢！
杜德偉同蕭瀟拍台劇《眉飛色舞》時，有指杜德偉對女方一見鍾情，所以有場咀戲係假戲真做。杜德偉噚日喺台灣接受訪問時講到呢件事，佢大叫：「我成功了！」因為證明佢演得投入喎！而蕭瀟話啱啱同男朋友分手，冇準備咁快接受新戀情。睇佢哋跳舞時咁合拍，唔知發唔發展到成情侶呢？
上星期六亞洲盃足球賽決賽嗰場中日大戰，引起香港市民關注，而當晚明珠台平均有十六點收視，即大概一百零五萬觀眾捧場，最高重去到二十點，有成一百三十一萬觀眾，成為明珠台上星期收視最高嘅節目。至翡翠台前晚播嗰場阿仙奴對曼聯嘅社區盾賽事亦有平均十五點收視，即九十九萬觀眾捧場。
漫畫家馬榮成前日喺內地出席四十集連續劇《風雲3》嘅記者會，馬榮成對新劇好有期望，重話劇情會着重喺無名同慕應雄兩兄弟嘅決戰上。至於演員，導演李惠民話會滙聚中港台三地嘅實力演員，問到馬榮成覺得邊位演員適合時，佢雖然面有難色，但就透露鄭少秋非常適合做性格嚴肅嘅無名，秋官外形咁穩重，又真係幾適合喎！
早排有傳廖碧兒同劉愷威）分手，但噚日下晝五點幾，廖碧兒去紅館準備夜晚做許冠傑演唱會嘅嘉賓時，竟然俾馮仁昭見到劉愷威揸車送佢開工，愷威一見馮仁昭即刻笑得好開心，反而廖碧兒就好似見鬼咁飛身走入後台。事實證明佢哋分手只係流料，莫非係有人想轉地下情，所以放流料出嚟？
台灣名模林志玲噚日喺台灣出席郵票簽名會，佢嘅fans愛屋及烏，同林志玲合照重預埋林媽媽㖭，兩母女同樣人氣旺盛。林志玲花咗十五萬港幣買咗五百套郵票，而部份攞唔到簽名嘅fans即時大聲抗議，嚇到林志玲好驚青㖭！
