阿仙奴日前贏咗社區盾，先拔頭籌，一批年輕球員重踢得唔錯；今周聯賽揭幕戰作客愛華頓，肯定被睇好。不過，風光背後，重有好多不明朗因素，喺開季前幾日重未搞掂喎！
雲格喺社區盾被迫用西班牙小將費比加斯擔任正選，除咗同韋拉轉會皇馬事件，同埋由馬賽轉會過嚟嘅法米尼手續出現問題之外，伊度亦因為踢完美洲盃延遲歸隊，所以類同位置球員就得番費比加斯。最弊就係伊度原本十七號歸隊，𠵱家因為又入選巴西國家隊要對海地，再次延遲向阿仙奴報到；雲格非常唔滿意，急急想簽卡域克番嚟頂住。
依我求大俠所見，波友想投注阿仙奴揭幕戰贏波，不妨等吓呢四個球員問題最終結果都未遲，作客讓半球以上，唔使心急喎。
亞洲盃經已結束，最佳球員雖然最後由日本隊中村俊輔奪得，但係中國足球先生鄭智亦有出色表現，唔少歐洲球探都睇中佢；最新傳聞係拜仁會用二百萬歐元（約一千八百八十萬港元）簽佢。我求大俠唔多信，並非懷疑鄭智潛質，而係喺亞洲盃踢得點出色，但始終差過歐洲波，根本未達踢拜仁水平，早前話佢有機會投費倫天拿都係謠傳啫。
星期日嘅歐洲波都算正路，相信早瞓嘅球迷會比遲瞓贏多啲。點解我求大俠咁講？咪因為阿積士喺荷蘭超級盃爆大冷輸波，兩度領先下竟喺完場前五分鐘失三球，以二比四落敗，真係臨尾香。如果球迷早瞓，佢哋多數會買較早開賽嘅賽事串射；由於戰果正路，相信賺唔少，反而諗住拖埋阿積士W，睇怕贏埋點知埋門唔掂，咪就損手囉！
新一屆英超聯喺星期六揭幕，升班馬諾域治嘅女班主戴莉雅史密夫，唔知係咪新升班搞吓新意思，諗到噱頭嘢；就係叫球迷喺聯賽首場對完水晶宮之後，一齊到球會嘅餐廳為球會祈禱，佢重請埋一位叫麥史雲尼嘅神父嚟主持彌撒㖭！不過我求大俠就覺得好奇怪，點解唔係喺賽前祈禱而係賽後祈禱呢？唔通有信心贏波，賽後先祈禱感恩？