黎明昨日在中環出席活動時，提到孔慶翔視他為偶像，並模仿他的唱腔演繹其歌曲《我的親愛》時，黎明讚孔慶翔是個有智慧的人，並建議找對方做IQ測驗，他更希望將來在慈善活動上可與孔慶翔合作。
黎明昨日以公益金籌募委員會委員身份，出席在中環舉行的「長和33不盡為公益」宣傳活動，他透露會為公益金籌備多個慈善活動，希望大家可以踴躍參加及捐款。
提到孔慶翔（WilliamHung）公開稱他為偶像，黎明說：「我覺得佢係個有智慧嘅人，大家不妨同佢做吓測驗，佢真係IQ比人高，大家想攞笑料寫開心啲畀讀者睇，你估佢唔知咩，佢都識放鬆畀你哋寫，佢好有個人特色。我好欣賞佢，我睇過佢啲MV，好好笑。」
對於孔慶翔早前出席新城「國語力頒獎禮」時，曾公開表示希望跟黎明見面，黎明對此說：「我喺香港都唔攞獎，不如我頒個獎畀佢，我哋未必一定喺頒獎台上見面，可能好多場合都會見到。」
對於孔慶翔不時模仿其唱腔，黎明說：「我呢排有睇到佢嘅新聞，我籌備緊唱片。」問他可介意在慈善演出上跟孔慶翔攜手合作，他說：「可以諗吓，不過𠵱家人哋拍緊戲，總之唔好太過商業性就係一件好事，觀眾都睇得開心。」
而黎明前晚在九展演出雷頌德音樂會時被問到王菲前日生日，黎明說：「我send咗SMS畀佢，呢幾日好多人生日。」提到與其相識及合作多年的雷頌德時，黎明表示二人曾為選曲嗌大交，他還說：「我同佢好夾，大家都認真工作。」
此外，譚詠麟昨日在中環出席活動，提到孔慶翔時說：「一個人有機會應好好把握，要真正下苦功，唔好氣餒，唔使所有人鍾意你，我都聽過人叫佢『美國夏金城』，總之盡力，唔好畀自己咁大壓力。」而張天愛昨日在北角綵排「2004綠野仙踪」芭蕾舞劇，談到孔慶翔時，她毫不客氣地說：「佢成個小丑咁，令人覺得香港女仔就好似蘇絲黃，男仔就淨係識打功夫同好似佢咁，佢搞到香港人好尷尬。」
採訪：李珮洳、楊潔雯
攝影：陳慧安、楊潔雯
