左丁山睇《蘋果日報》，好少睇娛樂名人版，最多只係望吓C1（封面）及C24（封底）嘅靚女相。星期六嘅C24版有靚相睇，李依琳與鄧裕鏗手鈪傳情咁講。李依琳係邊個？左丁山真係唔知，睇相就係青春玉女一名，咁嘅打扮，去到美國讀大學，只要佢鍾意，幾打男朋友會喺佢宿舍門口排隊。至於鄧裕鏗，原來係鄧永鏘之子，即係鄧肇堅爵士之孫，喺香港已屬於blueblood一族，肯定會在蘭桂坊大受歡迎。
鄧裕鏗爸爸鄧永鏘在星期六《南華早報》專欄文章，令人眼前一亮，唔睇唔知，鄧公子呢位雪茄王子、中國會創辦人，竟然與一般富家公子唔同，政治理念與佢嘅同輩陳啟宗、羅康瑞完全相反，贊成立法會全部直選，鄭大班是英雄，俞琤唔啱，商業電台𠵱家希望走內地路線；又話佢如果可以，一定投鄭經翰一票，不過佢住在港島，會支持民主黨。
鄧永鏘以前返大陸住過，幾愛國㗎，何出此言？佢話住一年之後，佢發覺自己愛中國，但唔喜歡共產主義，所以搬返嚟，香港先至係最適宜佢居住嘅地方。佢又話九七之前好多人猛咁挨佢介紹英國官商名人畀佢哋識，而呢批人現在全部係愛國分子！
唔好以為所有富豪都真係愛國愛黨，得把口啫，佢哋嘅第二代第三代去晒英國、美國讀書，基本上唔多識中文，要呢班豪門第三代去北京體驗革命經驗，走都走唔切。蘭桂坊、蘇豪區一帶就最多愛國富豪第三代、低調富豪第三代，白頭T識得好多呢類人，佢嘆息話：「第二代多數喺華爾街、外資公司歷練先至返嚟接手公司生意，但第三代唔肯吃苦，讀完書就返嚟，直上公司管理層，鍾意紅酒與高爾夫。正因如此，其他人有大把機會！」