港股再經過噚日嘅考驗，證明市底確係好強，恒指早段最低12415，都只係跌63點；期指則低見12383，跌130點，但中段大市已一度反跌為升，下晝走勢在窄幅內上落，恒指收市12467，微挫11點，成交縮到只得93億元。
藍籌以地產股表現最突出，恒地（012）嘉亨灣熱賣，通宵內購售出逾400個單位，海景呎價高見9500元，恒地已套現20億元，成為噚日最省鏡嘅大藍籌，至於長實（001）同新地（016），亦有進帳。長實升破60元阻力，第一個目標係64元，再下一站係69元；新地目標係70元；至於心水股新世界（017），仍睇8元。
國企股未有勢，但近期唔少大芬都係咁收集，上周推介嘅上海石化（338），摩根大通就大手增持成6000萬股，令持股量上升到逾4億股，家吓股價牛皮，相信只有一個解釋，就係時機未成熟，第日一開車，升破3元阻力，4字頭會好快見。
銀建（171）呢輪好強勢，上周推介時係1.85元，噚日已去到近2.0元水平，看來進一步注資的行動會好快落實，由於中期上升大浪已確認，初步目標係2.25元，整固後再上，可見2.75元。
另一隻走勢好靚，而又快現突破的實力股就係遠東發展（035），佢喺1.6元水平已橫行大半個月，成交亦縮到好少，睇周線圖，由3月中開始，成個大型嘅複式頭肩底，左肩造咗6個禮拜，右肩時間已差唔多，大型收集完成，MACD已出現「牛牛」入貨訊號，一衝破頸線1.67元，目標指向2.45元。
遠展上年度（04年3月結）轉盈賺1.49億元，往績PE11倍，但今個年度，盈利肯定以倍計增長，單係售樓同酒店嘅盈利，起碼有3.5億元，加上出售旺角物業獲利2.8億元，合共6.3億元，每股盈利0.53元，預測PE只係3倍。
上海錦秋加州花園上年度只賣了400個單位，已賺過億元，加州花園重有5300個單位待發展，以每年賣1000個單位計，重可以賣5年，而樓價亦會穩步上升，即係未來5年，每年起碼都提供3至4億元盈利，再加上酒店同租金收入，就算股價升到上3元，PE都只係6倍，穩穩陣陣，又可以食大茶飯，揸得過。一升破1.67元，加碼可也。
郭兆誠