市場憧憬格老可能會放緩加息步伐，將有利港股，加上四叔的嘉亨灣賣得唔錯，刺激地產股造好，收窄港股的跌幅。
恒地（012）升1.7%，收35.70元。不過，佔嘉亨灣50%權益的中煤（003）未受刺激，股價更下跌0.7%至13.70元，成交達7708萬元。早前一波預期嘉亨灣可為中煤帶來15億元稅前盈利，該盤熱賣肯定屬正面消息。
黑客話，公司最近回購，但當股價升至13.50元後則停晒手，股價在13.90元見阻力回落，除非公司提價入市回購，否則投資者未必敢跟進。
Cookie話，最近發展商高調同知名炒家簽署買賣合約，又透過地產代理話某某炒家斥巨資掃貨，又預期炒家資金第三季再度流入樓市，似乎樓市經過一輪調整後，又再蠢蠢欲動。
航運股上半年業績多表現不俗，但投資者似乎對航運業周期就快見頂有戒心。東方海外（316）盈利勁升逾兩倍，但股價升至24.60元即有大戶出貨，收報24元，升幅收窄至0.6%。中海發展（1138）盈利增長93%，而且預料下半年增長持續，但仍有獲利回吐，收報5.10元，跌3.8%。
長和系宣布「長和33不盡為公益」計劃，一於香港市民捐3元，佢哋就捐3元。不過唔知捐款有冇設定上限，因為如果全香港人都熱烈響應，680萬人每人捐300元，長和系就要捐20.4億元，係一個幾大的數目。長和系咁熱心做善事，唔通意味上半年業績好鬼正？
阿虎