爆機狂迷：<br>《迷惑星人》空降地球化身整蠱專家

爆機狂迷：
《迷惑星人》空降地球化身整蠱專家

雖然《WinningEleven8》剛推出，不過同期推出嘅《迷惑星人》反應都唔錯，口碑好主因係CAPCOM喺GC上嘅一系列創意Game，如《ViewtifulJoe》、《Killer7》等，機迷相當之受落，廠商將成功方程式照搬到PS2，推出《迷惑星人》，好有美國動畫Feel，最特別係玩法夠創新，玩家將扮演蠱惑外星人，周圍去整蠱人，誓要成為整蠱專家，非常過癮兼趣怪。
記者：許福合

跟一般打打殺殺遊戲不同，《迷惑星人》內玩家將扮演外星人，對外星人來講，地球人是最野蠻嘅種族，只要見到外星人就會使用暴力，非常危險，於是外星人會使用類似捕捉槍嘅道具，只要向人掃描，就可以變身成那個角色，既可隱藏自己外星人身份，又可利用角色嘅不同技能，向人類製造各種惡作劇。
每次惡作劇成功後，可以取得獎勵金幣點數。每版都會指定一個完成條件，例如初期會定下10分鐘內取得500個金幣，有時又要與電腦對手鬥多金幣作為過關條件，可惜一開始只有8關，未必可讓玩家過足癮，不過當完成特定條件，可以開啟隱藏嘅二人合作及挑戰紀錄模式，另外亦有對打玩法，以上下分割畫面進行遊行，可與朋友鬥多金幣決勝負。

■玩家要不停變身人類，以各種整蠱術去獲取金幣。

■愈整蠱得人多，就有愈多錢執。

受創傷會剝光豬
遊戲中將具備多個不同場景，由鬧巿、西部小鎮、甚至《生化危機》嘅殭屍舞台等，每個場景人物角色都有不同設計，外星人亦可變身成唔同外貌嘅人，每人都有唔同技能，連「生化隊」嘅Jill同追迹者都會登場，故此應多花時間，物色一個有用技能嘅人。
同時，亦多留意地圖上飛碟嘅位置，因為每次變身後，該飛碟都會更改地點，要盡量縮短搵飛碟變身嘅時間。另外惡作劇後，被戲弄嘅人都會追打玩家，好處係引一班人集中整蠱，反攻後跌錢效率高得多，不過被打一次，外星人就只會剩下內衣褲，再被打一次就會變回外星人，即時人人喊打兼會跌錢，呢個時候就真係要「速逃」喇。

■當掃描其他角色後，走回飛碟底下，就可以變身。

■噢！被打至剩番底衫褲，醜死鬼！

■被整蠱過嘅人會發狂追住玩家圍毆。

招式多變講策略
《迷惑星人》最過癮要數大堆頭惡作劇，加埋應有數十種之多，而且每個版圖都會有唔同類型嘅惡作劇出現，當中大致可分為攻擊同逃走技能，攻擊由拿起咪，用難聽歌聲令周圍嘅人難受，又可出奇不意放出帶有強烈臭味嘅大臭屁、落雷讓人麻痹等等招數，逃走技能則有隱身、踩Roller及飛天大炮等，雖然種類好多，仍要技巧地配合，好似唱歌最好喺人堆中使出、放屁只能對付背後嘅敵人、被人追時用隱身同踏Roller加速就最啱，另外有時變身後，技能會以問號代替，提議先按掣看看有咩技能，再決定戰術，效率會高得多，當遇到對手玩家，可以直接「攻擊」對方，若可以令對手打回原形，有錢執兼且大增勝算。