美股散完，港股冇乜點傷，恒指只係微跌11點。成份股中3隻重磅地產股長實（001）、新地（016）同恒地（012），都有進帳。外圍股市尤其係美股，一旦跌定，港股又會升過。即月期指低水50點，幅度唔大，而滙控（005）同恒生（011）除息總共會拖低恒指42點，期指低水冇乜指導作用。
滙控C輪9783：滙控張成績表一致好評，早前瑞銀出報告睇136元，摩通睇138元，高盛又諗緊新嘅目標價。滙控派完中期成績表後，過去5日，日日喺118元上下浮沉，消化一輪，隨時向上突破，要搵啲C輪炒吓搵米。
滙控C輪，輪多眼亂，先將嗰啲溢價稍高嘅剔走，向低溢價者埋手。9783除咗壽命稍短之外，條件靚絕，輪價81仙，溢價負0.8%，槓桿率14.7倍，交投又旺，日日有幾十球轉手，上車同跳車都非常容易。計埋正股派息因素，隻輪都幾乎平水，因為平水之故，有效槓桿率14.3倍，幾乎同表面槓桿率14.7倍相同。正股一旦郁起上嚟，隻輪有權啖啖肉。當然，正股如果行錯方向，隻輪亦都會傷得好重。隻輪引伸波幅得10%，好似未試過咁低。壽命係短啲，不過9月底先至到期，過多幾個禮拜先至變末日輪。
中移動C輪9813：昨日拖低恒指最多嘅係中移動（941），中移動收22.55元，跌20仙，未來走勢估計反覆向上。有平貨唔怕望多兩眼。中移動C輪好多隻都買唔落手，9813比較正路，12月初夠鐘，輪價25.5仙，溢價3.9%，槓桿率8.8倍（實際槓桿率6.3倍），引伸波幅32%。
章盛