浙江玻璃（739）在6月份受遠東生物制藥（399）出事波及，令到這隻民企股股價一度急挫，但好快就收復失地。隻股在7月底發出通告，打開口牌話公司截至今年6月30日止中期業績，盈利有望較去年同期增加80至100%，股價立即有反應，升回勁跌之前水平。
經紀黃話，數數手指，家陣已經差唔多到8月中，斷估浙江玻璃就算唔喺今個月底，亦會喺下月初公布業績，家陣留意定隻股，睇怕亦冇壞。
佢又話，最近有證券界探訪過浙江玻璃，表示玻璃價格保持平穩，仍與去年第4季的高位相若。至於先前公司話改進產品種類，生產高毛利率的汽車玻璃，但因為內地實施宏調措施，汽車產業受到影響，而有關產品亦難免受影響。不過，據聞浙江玻璃又有新產品推出，包括建築用的防火耐熱玻璃，甚至手機屏幕使用的玻璃都有。
浙江玻璃噚日微升1.1%，收2.15元，但成交唔多，只得52.6萬股，金額113.85萬元。
慕容小初