立法會金融界候選人李國寶噚日同傳媒講未來四年工作大計，唔知喺咪自動當選，佢心情極靚，竟然主動提到兩年幾前轟動一時嘅緋聞，當年佢同紅顏知己廖碧欣被狗仔隊跟蹤直擊去巴黎，被記者聽到廖小姐叫佢baby，寶baby呢個外號亦係由此而來。
噚日寶baby同記者傾咗成個鐘，記者最後問佢成日上京，好似好神秘，李國寶答話，上京只係講經濟事務，完全唔神秘，本來可以到此為止，點知寶baby爆多句，「如果你哋follow（跟蹤）我，好似follow我去巴黎咁，就知冇嘢，但北京你哋又唔follow先至弊。」
成班記者哄堂大笑，即刻追問寶baby點睇過去四年嘅任期間，搞出單咁嘅緋聞，寶baby一啲都冇嬲，笑得好風騷咁話，「我唔想再講。」
講開選舉，寶baby公然開賭，以蛋撻為賭注，話睇好金融服務界嘅詹培忠會當選，其餘候選人胡經昌、馮家彬、張華峰同馮志堅唔知會唔會畀寶baby激死。
外號「三點不露」（即下午三點前早退離開立法會會議）」嘅寶baby話，立法會若有鄭大班及詹培忠加入，肯定冇咁悶，自己可能會六點先走。
（圖）寶baby噚日好風騷，自動提起兩年幾前自己嘅緋聞。
傳真︰2623-9278
電郵︰