港股剛剛好番多少，但油價升唔停，而美國的經濟數據又顯示經濟好似唔係預期咁掂，真係令投資者無所適從。不過，市場仍傳出有公司想搞配股。
經紀黃話，近排獲多間證券行一致唱好的富豪酒店（078）傳出批股。富豪獲得證券行推介的原因，主要係因為公司減債進度好，赤柱富豪海灣賣得好幫輕唔小，而旗下的酒店則受惠於自由行。
但畢竟隻股家陣嘅債務仍以十億銀計算，如果有機會在市場上集資，當然唔會錯過。
富豪上周五跌3.77%，收0.255元，成交股數4493萬股，金額1148萬元。
另外一間傳聞有意配股的創業板公司，就係剛剛公布截至今年6月底中期業績的上聲國際（8226）。上聲公布中期盈利有499.2萬元，比舊年同期上升100.48%，更派發第二季股息0.16仙，在創業板股嚟講，真係算唔錯。
年輕賓架同小初講，傳聞上聲有意集資，用作增持旗下合資項目，但隻股規模細，加埋成交欠活躍，經常冇成交，所以暫時未聽到有證券行拍心口幫佢哋搞配股。
慕容小初