好多人都話季初波難賭，前晚啲德甲聯就應驗呢句話，爆到七彩。除咗拜仁外，其他被睇高一線嘅球隊幾乎全部失分，球迷喺季初買波，都係睇定啲好。
如果球迷唔善忘，應該記得漢堡上屆首仗喺主場吞咗漢諾威三蛋，拜仁大前屆就喺揭幕戰作客輸畀慕遜加柏。前晚六場德甲，五支喺主場讓波嘅球隊，冇一支球隊可令捧場客贏錢。
好似哈化咁，竟然喺領先兩粒下俾波琴迫和；而多蒙特同凱沙羅頓重樣衰到輸埋，俾禾夫斯堡同升班馬紐倫堡搞掂；至於利華古遜雖然靠范沙喺補時入波執番三分，但亦只係令捧佢哋嘅球迷唔使輸（亞洲盤讓一球）。
季初爆冷頻頻，好大程度係同啲強隊未上力有關。英超聯、西甲聯同意甲聯亦會陸續展開，雖則多支強隊都喺呢個夏天增兵，但如果強隊一定贏，希臘就攞唔到今屆歐國盃啦！所以，球迷喺季初買波，千祈咪見到強隊就瞓身，應睇定啲先至落注。
英超聯熱刺嘅季前熱身賽成績奇差，打十一場只贏兩場，前晚主場對住意甲升班馬卡利亞里都要輸一比二；而今夏熱身賽，英超球隊對意甲球隊幾乎全勝，係得熱刺咁失威啫。新教頭辛天尼睇怕好快又再繼歐國盃帶領法國喺八強出局後，再成為各界抨擊嘅箭靶嘞！
神奇教練米路天奴域，因為先後帶領過多支國家隊首次打進世界盃決賽周，從而成為一眾足球弱國救星。不過睇嚟佢唔打算再施呢個「魔法」，因為呢位塞黑教練決定向錢看，過去卡塔爾同一眾過氣球星搵真銀，執教當地聯賽球隊。求大俠覺得咁都無可厚非，搵多筆退休金都好嘅！
前巴西球星羅馬里奧日前被里約熱內盧警方拘捕，理由係佢第一位髮妻告佢無為兩子女提供撫養費。呢位現屬富明尼斯嘅老將縱橫球壇咁多年，踢過好幾間名牌球會，又去過中東掘金，照計唔會莫財，怕且都係佢玩鬥氣唔肯畀錢。不過如果真係因為咁而被拉入衙門，值唔值得先？
迪拉斯上個月講過，雖然佢協助希臘勇奪歐國盃，但唔代表球會前途似錦。迪拉斯經理人日前講明，羅馬已經表態唔受迪拉斯玩，佢哋歡迎任何球會提出斟介咁話。查實佢效力國米嘅同鄉卡拉古尼斯面臨類似處境，有好價就賣。可以話，希臘奪歐國盃，並無幫佢兩個提升身價。