大班冇落新界西，李卓人成班都冇咁慘，因為新西已經有十二條名單（程樂蓀提名冇效），多隻香爐又點止多隻鬼咁少。不過，就算大班唔嚟搞亂檔，民主派有成六隊人，啲選民眼都花。
阿人都知大鑊，最近佢去派傳單，就有選民問佢應該點分票，佢當堂被考起。講真，民主派條條有實力嘅名單包括何俊仁、梁耀忠、達仔同佢都想攞有超過兩成嘅支持，咁就有機會取兩席，唔使益咗民建聯嘅譚耀宗同鄉事派嘅張學明，但你叫選民應該投畀邊張名單呢？根本冇得協調，連一席都保唔住就蝦碌。
所以阿人都唔再諗咁多，努力拉票。𠵱家佢每朝七點企喺巴士站派傳單，同選民握吓手，都好有用，只係啲單張去得比佢想像快，印咗二十萬張睇嚟唔夠用。「我自己派好多人都肯攞，每日合共派成萬幾張，好快派晒。」阿人愈講愈興奮，受歡迎只好加印，佢自己就贏硬，其他隊友？唔顧得咁多咯。
傳真︰2623-9278
電郵︰