港股上周五過了一關，跌唔落，表現遠比外圍強勢，恒指在12400之上顯露可靠的承接力，今天又要面對另一次考驗，美股連續大跌兩日，杜指共挫掉300點。
美國經濟數據表現，極為參差，上周五公布的新增就業人數只得3萬多，而預期則有22多萬，數據令市場大失所望，加上對沖基金同大戶繼續利用高油價操控，以及恐怖襲擊陰魂不散，美股一掉頭，又再急跌。不過，上個月大摩嘅專家講過，美股未見底，因為唔見有恐慌性拋售；家吓拋售已出現，係咪見底先兆呢？
今日港股若果重喺高位守得住，強勢就唔使再懷疑，外圍唔就，極其量都只係拖多兩三日，整固完成後，就會破關而上。今個升浪，藍籌應以銀行同地產股做主力，滙控（005）、長實（001）、新地（016）同新世界（017）等，保守估計可上升1成，特別係長和系，始終覺得佢會有異動。
零售股升完，會輪到工業股，大嘅如建滔化工（148），細嘅如華豐紡織（364），都處突破邊緣。建滔日前推介過，呢輪主要嘅沽家係「波仔」，但佢又公開睇好，話目標價17.6元。大家應該重記得，早輪儀征（1033）又係俾「波仔」㩒到實，結果如何？一收盤，衝破1.5元阻力，就揚長而上囉！家吓建滔阻力在15元，睇下幾時破位？
華豐股價已重上3條平均線之上，上周五更衝破長達半年的下降軌，且連續兩日大成交，中期升浪確認，初步目標係4月初的高位1.04元，中線可挑戰2月中高位1.21元。
04年度（9月年結）的上半年，華豐營業額1.76億元，升12%，獲利5061萬元，升11%，每股盈利6.6仙。今年3月，新開展的紡紗業務全面投入運作，兩附屬年產量分別為6.5萬錠（約1.2萬噸）及4萬錠（7000噸），提供盈利貢獻，估計全年度營業額可大升至5億元，盈利1.1億元，每股盈利14.2仙，預期PE8倍計，股價已可升上1.1元。
集團與意大利襯衫布料生產商MVB組成合營，最遲明年初便可全面投產，製成品初步透過MVB悉數售往歐洲，稍後再拓展亞洲市場。
郭兆誠