中日亞洲盃足球決賽，八方買日本贏，同好多老友一樣贏到偷笑。話之你「愛國」，講到錢呢一層就一定要好似商台講嘅一樣要理性。中國隊都重係一盤散沙，波到人唔到，得個睇字，就算全個北京嘅市民做晒維園阿伯都冇用。
反而㗎仔就唔同嘞，人哋愈俾你侮辱，意志愈堅強，面對狂熱嘅十三億人，呢十一個球員身入虎穴，贏到三比一，呢一樣嘢就係叫實力！
講到感性與理性，民建聯主席馬力，忽然感性起上嚟，宣布最近返大陸驗身，驗出有「結腸癌」！正如啲左嘴時時話頭：「為甚麼不遲不早，偏偏喺呢個時候發現有腸癌？」
有病一定要醫。馬力愛國愛黨，操勞半世，若然真係有Cancer，或者都唔出奇。不過咯喎，有咗癌症，若然祖國重督佢去參選，呢個祖國會唔會太殘忍呢？胡溫咪應該講吓人道，撤換馬力，運佢上三○一醫院，用江主席御醫加氣功師，悉心照料，好過叫佢抱病企街派傳單。萬一派派吓頂唔順，俾人見到祖國對自己隻頭馬咁無情，吓吓利用到盡，點吸引年青一代「愛國」呀？連馬會嘅賽事，隻馬臨場入閘若然發現流鼻血、發軟蹄，都會派個獸醫睇睇，宣布退出吖。
選舉之前，政客宣布患癌，喺一個感性過度、中方話政治質素低嘅社會，又係好易吸引到好多師奶嘅淚水。
不過，如果喺政治上斷症，患結腸癌嘅究竟係馬力定民建聯？似乎民建聯似啲。長期思想便秘，二十三條同○七普選，多次肚瀉，啲政綱又寫到好似帶血嘅大便咁，呢啲至係政治結腸癌嘅症狀喎，係咪？
傳真︰2623-9278
電郵︰