全城焦點所在嘅西灣河嘉亨灣，噚日終於公開內購，唔少買家一早已經到場，但進度慢，原定一點開賣，結果成三點至有得揀樓，聽聞部份重喺外面等嘅客戶大發代理脾氣。
售樓處門外迫滿買家，問番恒基進度咁慢，係咪想藉此造勢？太子爺李家誠解釋，話啲客謹慎咗好多，見到有個客揸住十幾個單位，左度右度，二十幾分鐘至決定到買邊間。佢重話已經盡快做㗎嘞，啲同事都好忙，又話自己都想個盤好賣。
有買家同蘭西講，覺得揀樓流程好慢，但因為發展商提供好多嘢食，好似龍蝦、魚翅同乳豬，所以都唔介意。美食奉客呢招原來咁有用嘅。
西灣河嘉亨灣都算巴閉，公開內購前有大量行家嚟睇樓，賭王何鴻燊四太梁安琪重忍唔住入番幾層。新地代理總經理周國賢噚日突然到場，重話入咗票認購㖭。同恒基營業部總經理張炳強互相擁抱，又指手畫腳，回應記者時話自己入咗飛喎。周國賢同張炳強都係玩得之人，入票嘅說話應係純屬搞笑啫，等記者有啲花絮寫。
太子爺李家誠親自喺嘉亨灣督師，集團一眾高層到齊撐場，包括發展部總經理黃浩明，問到恒基有冇趁勢加快補充土儲，佢只係話公司有協調。對於近排唔少發展商都嫌政府補地價太貴，佢就話唔覺得貴，不過要政府同發展商兩廂情願至得；另集團冇主動勾地嘅迫切性，而且增加土儲嘅方法有好多，例如投市建局重建項目。
嘉亨灣公眾內購話收到近二千張入票，現場唔使問梗係人山人海啦，蘭西喺現場所見，左一堆人右一堆人，重有幾條人龍㖭，簡直有七國咁亂嘅感覺。
後尾再留意吓，發現發展商雖然做內購，但就冇關閉示範單位，重有專車從各區接載客人嚟參觀㖭，無怪現場墟冚非常，途人經過見到，真係以為個盤勁熱賣。呢啲都係造勢伎倆，睇樓客變成充撐場面嘅免費臨記。
傳媒一早到場，希望搵到嘉亨灣頭籌買家做訪問，講吓佢對樓市睇法，各代理行都話自己有頭籌買家，搞到蘭西一頭霧水。
原來每間代理行，將安排揀樓嘅第一名買家當係頭籌，但後嚟就轉為透過佢哋第一個揀到樓嘅當係頭籌買家。
蘭西問發展商，點知佢哋又話第一名買家係姓陳，重唔係透過代理買樓㖭，恒基原本話可以安排做訪問，收尾又話佢唔肯上鏡，最後重冇埋下聞㖭。頭籌買家身份，認真夠神秘。
恒基為令嘉亨灣內購過程不容有失，事前包起隔籬鯉景灣蘇豪東十間食肆，畀代理用嚟編配買家次序之用，其中一間就招呼新聞界。時間就由下午一點至晚上十點，唔通知道賣樓要賣到好夜？
唔知係咪間餐廳太細嘞，搞到各代理行嘅客，要迫喺門外等，代理要學發展商咁，叫籌號，放買家入餐廳內編配揀樓次序，然後至去售樓處。
恒基冇講包呢十間餐廳嘅費用，只係話食幾多就畀幾多；咁招待傳媒嘅一間就最唔好彩，因為去幫趁嘅多極有限。
蘭西
電郵地址：
