有讀者去年到One2Free專門店以信用卡購買手機，但並沒登記資料成為客戶，惟其後發現該公司於半年內一直「過數」收取月費。讀者事後向該公司查詢，獲覆「資料撈亂咗」，他懷疑其個人資料被盜用，隨即報警處理。本報轉介投訴後，CSL承認職員輸入資料有誤，已即時為讀者安排退款及致歉。
「我根本從未登記過成為佢哋嘅客戶，但就過足我半年數，我真係覺得好奇怪！」去年七月到One2Free門市購買手機但並沒登記「上台」的郭先生，對於無故成為該公司的半年「客戶」，他擔心其個人資料被盜用。
郭先生憶述，當時他往門市選購一部價值約二千多元的手機，並以信用卡繳費，「我喺呢度只係淨買手機，冇諗住用佢哋嘅網絡！」故其間並沒登記過任何資料以申請成為該公司客戶。
惟至本年六月，聲稱不常留意銀行帳單的郭先生表示，他無意中發現，其銀行月結單上有一項由One2Free所徵收的一百多元服務月費；他大驚下再翻查過去大半年的信用卡帳項紀錄，赫然揭發原來該公司於本年一月至六月期間，每月均向他收取服務月費。
郭先生隨即向該公司查詢，對方則指職員「搞錯咗……同其他客戶嘅資料撈亂咗……」；他百思不得其解並擔心個人資料被盜用，遂馬上報警處理及向本報反映求助。
經本報轉介後，郭先生稱已獲該公司跟進處理，除獲安排退款外，該公司亦承諾呈交一封道歉信，詳細解釋當中原因。
「佢哋啲職員好有誠意幫我跟進，但其實到𠵱家我都覺得好奇怪；職員話我買手機嘅同時，亦有另一客人正搞緊『上台』，而嗰個客人當時將信用卡號碼畀咗職員辦『自動轉帳』手續；不過個職員就入錯嗰個客人嘅號碼，咁啱佢所入錯嘅號碼，竟然同我張信用卡嘅號碼一模一樣！大大話話成十六隻字，咁都撞得中；我都無法解釋！」郭先生複述CSL的解釋。
One2Free母公司CSL公關部函覆本報稱，因個別職員資料輸入有誤致出現上述情況，該公司收到投訴後已即時聯絡郭先生跟進及致歉，並已退還有關金額，他對安排表示滿意。覆函又指，他們定會加強對員工的培訓，以確保時刻為客戶提供最優質服務。 （○七二七○四三）
服務熱線
電話：29908288
傳真：23702192
電郵：