上周五美股大散，今朝港股好難有運行。地產股本來領導緊大市向上，暫時都會窒一窒，遲吓仍有機會帶個市上番去。積極嘅態度係，喺低位收集C輪。想刺激，則若然個市唔係開得太低，執P輪短炒，不過P輪可能一開市已經嘜高，冇機會做嘢。
恒指C輪9773：恒指C輪9773上周收11.7仙，如果今日恒指散150點，隻輪大概散15%左右。隻輪係同類輪中主角，若然散得太厲害，例如見8仙嗰頭，則買些少博反彈。9773下月尾到期，溢價1.3%，槓桿率19.4倍（有效槓桿率12.8倍），引伸波幅23%。隻輪嘅溢價實際高過表面數字少少，因為滙控（005）與恒生（011）除息，會扯低恒指42點，另外中電（002）與港燈（006），及若干藍籌可能9月除息，亦拖低恒指少少。
恒指C輪9788，數據比9773靚些少，不過交投則係蚊髀同牛髀。
恒地C輪9038：恒地（012）賣嘉亨灣做咗地產新聞頭條，恒地股價有啲勢，如果跟美股跌落去，低位買C輪諗得過。恒地C輪11隻，9038最值得望多兩眼，年底到期，輪價33仙，溢價9.1%，槓桿率10.6倍（有效槓桿率5.7倍），引伸波幅39%。吼住跌10-15%之時，諗諗佢，用嚟短炒，咪長情。
中信C輪9139：中信C輪9139喺10月下旬到期，數據唔錯，輪價35.5仙，溢價負0.4%，槓桿率5.4倍（有效槓桿率4.7倍），引伸波幅19%，吼低位30仙邊邊上車。
章盛