李麗珍、韓君婷同呂良偉夫婦噚日去咗番禺幫一個內地樓盤做剪綵嘉賓，珍妹表示佢喺銅鑼灣嗰間嘅美容院分店近排竟俾委託管理嘅友人私自改名，而佢嘅銀行戶口最近又俾人查帳，珍妹以防萬一，第一時間取消咗個銀行戶口，而美容院嘅嘢就交咗畀律師處理。
珍妹最近打電話返自己嘅美容院，發覺竟然被人改咗個名，佢話：「間美容院係委託一間公司管理，係我個朋友負責，𠵱家件事交畀律師搞。」珍妹後來又發覺銀行戶口都俾人查過帳，佢亦發覺有少少損失，於是報咗警，同即刻取消埋個戶口。
另外，韓君婷最近同孔慶翔合作拍片，佢話：「佢媽咪好錫佢，重保護得佢好犀利㖭。」又問到佢有冇興趣喺內地買樓，韓君婷就話：「我啲屋企人喺晒新加坡，我諗都唔會喺內地買樓住㗎嘞。」
林曉峰（阿Lo）同老婆康子妮噚日去咗灣仔會展出席「親親牛牛」愛心慈善活動，𠵱家懷緊第二胎嘅康子妮重咗足足廿磅，佢話預產期喺九月。而阿Lo早排因公開批評無綫而被雪藏，不過佢噚日就透露日前得無綫高層陳志雲約見，重問佢係唔係對公司不滿，阿Lo就話：「其實我唔係不滿，只係覺得係溝通方面嘅問題。」
組合Cookies噚日喺尖沙嘴出席義賣活動，重即場唱出新歌，由於佢哋咪嘴嘅關係，Stephy因為唔記得歌詞而唱甩咗嘴，即時以笑遮醜。另外，近日又傳Theresa被公司雪藏，佢哋笑稱呢啲傳聞經常有，已經習慣晒，而佢哋嘅工作正排山倒海咁嚟，所以對傳聞一笑置之。
梁洛施（lsabella）同Boy'Z噚日喺屯門出席「南順美玫賀金禧50周年」活動，除咗唱歌表演之外，重有食壽包慶祝環節。lsabella聽聞謝霆鋒喺「何B仔」度鑲珠，即刻好尷尬咁爆咗一句：「嘩！好痛呀！」之後就狂笑。另外，Boy'Z成員Steven話佢前日唔小心𠝹傷隻手。
鄭融噚日喺將軍澳出席愛護動物協會活動，佢話飼養咗一隻十歲嘅西施犬，最近愛犬病咗，除咗要出入醫院之外，重俾鄭媽媽嘅指甲整傷眼球，獸醫就建議要做手術割咗隻眼，好彩呢幾日情況好轉，令佢放下心頭大石。
