麗豐（1125）好似供股供上癮，繼02年5月、03年3月後，今年6月又再宣布4供1，依據年年一劑呢個規律，麗豐處於安全期，有得諗。
呢勻麗豐4供1，每股供0.1元，睇番今年最大成交，亦即蟹貨區位置，大約0.3至0.35元位置，若果呢批投資者都有參與供股，供股後每股成本價講緊0.26元至0.3元。唔係挖苦，但現價0.154元實在距離家鄉價太遠，所以，估計短期冇幾大沽壓。
又呢次麗豐供股後，已發行股數由原本46.98億股，新增到58.72億股，每股資產值亦由原先1.1元攤薄到現時0.9元，但股價勝在夠殘，現價相對每股資產值，折讓高達83%。資產折讓實在好吸引，求其收窄到75%，麗豐股價見0.225元，回報率已經近「翻半番」，係咪有得諗？
講時講，前排供股，管理層話可以俾多個機會投資者買平貨，呢一點，似乎冇錯。不過，掉轉頭諗，麗豐資產折讓咁大，若果以高價進行公司回購，相信好多小股東會更開心。
一拖（038）03年度（12月止）純利1633萬元人民幣，業績有失眾望，今年4月遭遇大洗劫，由2.7元高位一插到底，最低見0.99元，最近位於1.2元載浮載沉。
只講兩點，今年宏觀調控，國家主力打擊鋼材呢類過度投資企業，鋼材價大幅回落，所以，一拖成本價可獲紓緩利好因素，估計今年下半年，情況會更加明顯。第二，國家農業政策講明，設法扶助農民改善生活素質及謀生技術水平，一拖屬受惠企業。最近一拖呈三角上落，上周五貼近阻力，踢穿1.2元，有得炒。
錢雋