已播出三百多集的無綫處境喜劇《皆大歡喜》，將於明年一月二十一日播映第四百四十五集後停播。由於該劇開拍以來演員靠該劇經常「爆騷」、登台及接拍廣告，《皆》劇停播，謝天華和顏國樑等演員均表示會對收入構成一定影響。
顏國樑說：「梗係悲慘啦，唔好講話拍咗咁耐捨唔捨得，我講現實演員要食飯㗎嘛。好似最近我同TVB續約咁，以前唔爆騷被公司減騷，𠵱家爆騷又要減我騷，我可以做得乜嘢？咪無奈接受囉。」謝天華則說：「未收到正式通知，其實拍劇都預咗會有完嘅一日，又唔係話個電視台唔做。」
而鄧兆尊昨日綵排無綫《活力動感樟木頭》時說：「《皆》劇一個月帶挈公司賺成四百萬廣告，我諗未必會停嘅。」而對於楚留香酒樓被申請清盤，兆尊表示不清楚，一切已交律師處理。
採訪：戴彩煥