大班封咪重去埋參選，港台本來最開心，不過周老闆嘅風格好多大班擁躉都頂唔順，結果大家朝早冇嘢好聽，不如轉去聽吓新城財經台。
八方問晨早節目主持人香樹輝多咗幾多聽眾，佢話唔知，要問甘國亮，不過阿香話，為咗湊吓高興，佢星期一起一連五日，會請金融服務界五位候選人，按報名先後上佢《中環會客室》嘅節目，同佢哋傾吓偈。呢個界別有位「金勞詹」詹培忠，「好草不怕回頭吃」都講得出；又有「富豪波友」富貴黨嘅馮家彬，而馮志堅就誓要捲土重來，張華峰後台夠硬，搞到報名排頭位嘅胡經昌隨時連任冇望，你話幾刺激。
係人都知小經紀唔易討好，可惜新城冇安排烽煙，啲選民冇機會打電話質問候選人，有人認為成為戰靶嘅證監喺論壇之後都應講番幾句，唔使俾人插到周身傷晒冇聲出，八方就覺得不必，事關講多錯多，隔岸觀火好過。
傳真︰2623-9278
電郵︰