選管會噚日同立法會一眾候選人抽籤，決定佢哋個候選人「冧巴」，即係話由今日起，選民就會開始聽到類似「支持1號某某某」、「請投2號候選人」呢啲口號。本來呢類資訊對選民非常重要，以往政府都會將所有抽出嚟嘅候選人編號傳真畀傳媒機構，不過唔知點解噚日選舉事務處嘅官員竟然同記者講話唔會咁做，理由係：啲資料有成三十三頁厚，逐間傳真畀傳媒機構好唔環保。吓？
八方其實都贊成要保護環境嘅，不過唔想「浪費」紙張都好簡單，有記者就建議選舉事務處將候選人冧巴擺上網，咁咪又方便又環保囉。點知位高官唔聽建議不特止，反而好氣燄咁講咗一句：「我哋做嘢唔使你哋教！」
有另一個官員重提醒記者，噚日係星期六，公務員返半晝，如果要逐間報館傳真份抽籤結果，就要下午返公司做嘢，到時又要用電、又要用水，咁就真係相當唔環保。哦！你講到咁，八方當然收到明白晒啦﹗
不過，選舉事務處後來都從善如流，話將抽籤結果擺喺政府新聞處，有興趣嘅記者可以上去攞。八方知道呢個消息當然開心，但係唔少記者都係將成份三十三頁嘅文件影印攞番報館，你估人人都可以過目不忘，用腦記低晒全部冧巴咩！
傳真︰2623-9278
電郵︰