失珠寶影帶　搵舊愛呵番
ParisHilton香閨被爆竊

富家女ParisHilton近排真係當黑，繼早前俾人打到口腫鼻腫後，上星期三佢同細妹Nicky所租住嘅洛杉磯寓所又被人爆格。據講Paris同阿妹總共損失超過約八十萬港紙嘅財物，難怪Paris喺被爆格嘅第二日，即刻要搵前男友呵番。
據洛杉磯警方透露，今次賊人係趁Paris兩姊妹喺周三外出時，整爛佢哋嘅窗門入屋爆格。《Us》雜誌重報道，Paris屋企今次失竊，總共俾人偷咗幾千美元現金、一批價值七十八萬港紙嘅名貴珠寶、幾個名貴手袋，同埋一部手提電腦等等。不過最奇怪嘅係，呢個賊連Paris同前男友NickCarter嘅合照同埋佢屋企嘅錄影帶都偷，如果批錄影帶係Paris自拍嘅春宮帶，咁就真係大件事喇！

繼續唔閂門
事發後，Paris重大發嬌嗔咁話：「我啲首飾同埋現金都俾人偷晒囉！」但係當美國ABC7電視台前日登門造訪時，發現Paris屋企居然中門大開，佢嘅防盜意識確實麻麻。
另外，Paris喺被爆格嘅第二日即刻俾人影到佢同前男友JasonShaw喺荷李活食飯嘅相，當時Jason重不時攬住Paris加以安慰，真係夠晒體貼。不過我羅拉見Paris當日心情咁好，睇嚟幾十萬對於佢嚟講，真係唔算得係乜嘢。