揭幕戰停電點搞世盃？
球驗客手記：德甲衰開頭要反省

○四/○五球季德甲聯前晚喺雲達不來梅嘅韋沙球場揭幕，由不來梅對史浩克04；點知個球場停電，搞到場波遲咗成七十分鐘先開。德國兩年後會辦世界盃決賽周，呢次事故正好畀佢哋一次反省機會，將來做好啲。
消息話喺韋沙球場附近進行工程嘅工人唔小心掘斷咗電纜，搞到韋沙球場停電。由於四萬三千名球迷已入晒場，加上場波又直播到世界各地，所以有關方面要即刻搶修，務求令場波可如期進行。喺嗰粒幾鐘收費台嗰兩個講波佬就慘囉，要不停吹水，但表現算係唔錯；我求大俠就認為可攞番上屆場揭幕戰嚟播住先，兩位仁兄咪唔使講得辛苦囉。
德甲聯一開咧就搞單咁嘅嘢，迷信嘅人話唔係幾老利，德國足球實冇運行；但我求大俠就唔係咁睇，事關德國人可從錯誤中學習，加強應變措施，令到兩年後嘅德國世盃決賽周可順利舉行。

碧根鮑華焗聽鹹古免費電話線貪唔過
德國名宿碧根鮑華先排同手機公司「O」簽約，重獲贈一條免費嘅電話線，點知嗰個電話號碼同鹹濕熱線嘅冧吧好似，搞到成日有麻甩佬喺三更半夜打嚟同佢講啲四級嘢；佢因為頂唔順就cut咗佢。碧根鮑華腰纏萬貫，又要着手搞 ○六世界盃決賽周啲嘢，應該早cut早着。

波圖突然炒新帥季前「兵變」凶兆？
波圖日前以教練迪尼利連續無帶隊操練、態度差為理由，突然請佢食無情雞。呢位前基爾禾教練六月至上任代摩連奴掌帥，尚未喺正式賽事領軍，咁快就無得撈，實際原因耐人尋味。佢一心大展拳腳嘅好夢落空，而波圖今季主力四散，又整單咁嘢，真係不祥之兆也。

比甲聯揭幕戰爆冷馬會冇開當救球迷
比甲聯喺上周五開咧，好在馬會未有為揭幕戰苗斯干對安德烈治開盤，事關最後戰果係苗斯干爆大冷以二比○贏波，馬會開漏呢場就真係救番唔少強隊擁躉嘞。其實安記呢場都算強陣，但可能分心周中嘅歐冠盃外圍賽，結果就俾向有「巨人殺手」之稱嘅苗斯干成功爆冷。

披頓俾湖人送走埋錯埠冠軍夢難圓
湖人老將披頓又要搬家！今年三十六歲嘅披頓噚日俾湖人聯同另一名老將霍斯送咗去塞爾特人，交換三個無名小卒。披頓上季自降身價加盟湖人，一心諗住可以贏番個NBA總冠軍，點知唔單只冠軍夢碎，𠵱家重俾湖人飛埋㖭，離總冠軍路愈來愈遠，真係欲哭無淚。