還記得上年哪一隊捧走了社區盾嗎？不記得絕不奇怪，皆因是項賽事美其名是揭幕戰，但實際受重視程度卻已淪為名牌友誼賽。人人唔願打，除咗費格遜，一為班後生仔，二為自己啖氣。
當車仔令到大家冇辦法鬥錢多之際，費爵爺今年決定重彈舊調，backtobasic，鬥鬥志。
去年表現滑落，費爵爺搵過不少藉口，其中一個聽落最有道理，佢話上年原本諗住畀堅尼淡出，結果令到隊波群雄無首，了無鬥志。確實硬漢堅尼之重要性，在於以身作則奮不顧身之外，重係毫無保留教導新人的大佬型球員；響今年曼聯準備培育另一班新人之時，堅尼上陣重責就係幫費爵爺湊仔，正如佢初加盟時超級隊長笠臣所做嘅一模一樣。
鬥鬥志，除咗堅尼之外，重有史密夫。
「我簽入史密夫，就是為了讓球隊找回曼聯過去最強硬的一面！」費爵爺呢句說話，好清楚話畀大家知，之所以簽辣椒仔，並唔係因為佢好波，係因為睇中佢夠火氣；亦一語道破未來紅魔的方向，各位反史密夫的曼聯躉，確要好好體會費爵爺之用心良苦。
由今季開始，曼聯未必擁有超聯最好嘅班底，但可能擁有最強嘅拼勁，正如十年前的師兄一樣。
今晚一戰，雖說賽前大家口中肯定毫不在乎，但可以肯定費爵爺比雲格更想攞番個彩，皆因上屆紅魔最大安慰唔係捧足總盃，而係冇輸過畀阿仙奴！至於阿仙奴季初焦點，係聯賽頭三場不敗而締造史上最長聯賽不敗紀錄，至於社區盾正一無所謂，萬一輸咗分分鐘重可以減壓㖭。
鬥心係今晚勝負之分野，所以曼聯冇得輸。