經紀黃噚日推介一隻相當冷門的股票，就係往日甚少成交，但近日有番多少人氣的白馬戶外媒體（100），佢話隻股嘅街貨，向來主要由基金持有。
據聞白馬將於9月8日公布中期業績，有外資大行估計盈利會升4成。比起年頭，白馬現價計回落幅度唔細，有一定值博率。
白馬於早幾日前，公布獲北京首都國際機場（694）一號客運站內所有廣告牌位嘅經營權，為期15個月。雖然分析員話呢單生意對白馬營業額貢獻有限，但起碼叫做多元化咗，唔使全部依賴巴士站廣告位。
白馬噚日升2.75%，收5.60元，成交股數765萬股，金額432.94萬元。
另外，大慶石化（362）公布2供1，每股0.30元，供股集資1.45億元。噚日復牌，股價應聲下跌13%，收0.33元。
經紀陳話，隻股集資額咁大，但有人肯全部包銷攬上身，似乎唔可以睇得太淡，話唔定人哋係搞緊大茶飯。
慕容小初