足智彩每日開幾十場波盤嘅日子又返嚟嘞，今日就用法甲聯一條主客和過關三串四，作為呢個專欄今季頭炮推介；再送多條有過百倍分頭嘅總入球過關。賭波嘅嘢一係中，一係唔中；球迷們，想中嘅就睇埋落去，千祈唔好走開嘞！
先睇主客和過關膽推介馬賽W，雖說呢支國內勁旅季前放走咗神射手杜奧巴，但亦同時針對性地補入多位中、後場球員，令到前鋒米度及新加盟嘅盧恩度拿，可望得到更多供應之餘，防守力亦比前更強。而主場作賽亦係馬賽強項之一，今日到訪嘅波爾多，近季愈見人才凋零，就連中場大將巴西世青盃國腳E哥斯達都放走埋，另一上季借將中場施拉迪斯亦還番畀皇馬，今季情況並唔樂觀，馬賽頭炮有得響嘞。
配腳博索察和亦合理非常，呢支上季法國聯賽盃冠軍隊，季前眼巴巴睇住核心人物柏達堤及法奧，畀馬賽及里昂呢兩間大會搶走，今季睇嚟又要由頭嚟過；但佢哋主場有啲威力，呢日作客到此嘅小島球隊阿些斯奧，亦未必可以趁佢病攞佢命，除咗和局，實不作他選。
另一半冷腳博圖盧茲贏朗斯，前者上季升班，即獲各方甚佳評價，惟可能未適應得甲組水平，最後只以下游成績完成聯賽；不過今季佢哋實力得以保留，兼從今日對手朗斯引入好波之人摩利拿擔正鋒線大旗；相反朗斯除主將摩利拿離隊，防線桑治及路爾、中場迪奧比亦走咗，初步情況並不樂觀，主隊圖盧茲贏波博得過。
是日再畀多條總入球過關大家諗諗，先要捉住利華古遜博跟漢諾威共入五球，因為德甲聯入球率偏高，四比一、三比二等波膽常見，尤其利華古遜更係呢方面「專家」。唔係亂噏㗎，你睇同日其他德甲聯比賽，入五球個賠率同呢場爭幾遠！
巴黎聖日耳門呢班波穩穩陣陣，啱啱開季都唔望班前鋒着火，今日作客守得住黑馬雷恩相信已達標，總入球宜一、兩球兼取；前述索察打和阿些斯奧機高，一比一波膽穩現，博兩球可也。
華度