美股周四晚突然插水，杜指大跌163點，收9963，納指跌1.8%，收1821，再創今年新低。油價回升及經濟數據欠佳是美股大跌市理由，但近期同樣理由質不低美股，為何周四晚可以？
趙飛雲突然醒起上周有美資大行話美股未見底，原因係未出現PanicSell。近期美股波幅窄，唔知周四晚大跌已否代表PanicSell？但美股技術再度轉差則係事實。
不過，美股急跌似乎對昨日港股無大影響，恒指低開100點後已經跌唔落，大部份時間在12440-12480水平窄幅上落，最後收12478，僅跌13點。
恒指全周升241點，升幅1.97%，周線圖前周出十字星，本周再以陽燭上升。恒指不但連續3周守在20周線之上收市，本周更進一步升破50周線（現處12345），技術上利好下周再升。
周四港股大升211點，期指成交大增至近39000張，加上之前在滙控（005）公布業績後，大戶力壓港股平淡倉，似乎這兩日大戶已完成轉好倉，從而解釋昨日港股硬淨走勢亦合理。昨日淡友尾市棄兵曳甲，期指倒升38點收市，收12513。
趙飛雲昨日金睛火眼昅實大市，恒指Call輪9971早中段收水甚多，其實相當吸引，但美股形勢有變，港股雖偏硬，仍有隱憂，所以放棄買入，留待周一再算。
此外，吉化（368）尾市雖回升，但未能升越1.58元高位收市，故按原部署在1.55元沽一半貨。10日線上升至1.49元水平，跌近會伺機補回。
趙飛雲