劉千石今年「孤身上路」參選，好多有心人都想幫石哥一把，相信石哥一啲都唔會孤單。八方聞說，岑建勳太太、前港姐謝寧都肯出力幫石哥助選，但係石哥唔肯證實，話目前重聯絡緊各路友好，到下星期先有名單公布，叫八方等吓，至於佢好友白雪仙就唔喺香港，去咗溫哥華休息。
石哥今日就搞花車巡遊造勢，戰友李卓人、梁耀忠同麥國風都會到齊。石哥嘅強項係同中央溝通，不過近日冇乜大陸人搵佢，連特首董建華都冇，據佢估計，民主派遲早都可以攞番回鄉證，認真樂觀。
石哥身體一直唔係幾好，佢認參選前驗過身，醫生話佢冇大問題，派傳單拉票都OK，當然唔可以博老命太疲累，奉醫生命，佢𠵱家每日都服兩劑中藥，話對個肝有幫助。好多人去過石哥嘅辦公室，啲文件周圍都係，但原來石哥屋企就好企理，窗明几淨，佢話間屋係台灣藝人羅大佑嘅舊居喎。
另外，八方聽聞，大班參選後好唔得閒，除咗日日落區晨操晚練外，重要忙於開咪，不過唔係做主持而係做嘉賓，噚晚就喺45條關注組個A45網上電台講足成個鐘頭，繼續發揮名嘴本色勁窒保皇黨，反寸暗指佢藉解約風波而做不公平宣傳嘅民建聯陳鑑林，大班話私人醒佢一條絕世好橋，「佢可以走上怡和大廈頂樓坐喺度幾日，咁記者就連續幾日影住佢，肯定上到幾日頭版。」雖然大班未入立會，但已經想做「班長」，講到明若黃宜弘開會瞓覺，一定會大聲喝醒佢。
（圖）劉千石參選前驗過身，醫生話佢冇大問題，但唔可以太勞累。
資料圖片
傳真︰2623-9278
電郵︰