恒指最低12391，散過100點，埋單計只係微跌13點，多得長和系撐住。長實（001）升1.25元，和黃（013）拍住上，亦升1.25元。
長和系C輪：長和系C輪好多隻都槓桿率好大，所以正股雖然只係升得兩巴仙多啲，啲輪價則「反應好大」。周二推介嘅長實C輪9227，單日再升23%，收50仙，周二到昨日，累升67%。當時推介嘅和黃C輪9390，昨日升17%，收82仙，4日累升61%。呢兩隻輪，溢價較低，槓桿率冇啲仙輪咁大，輪價升幅自然冇咁勁。
和黃C輪9785，做咗是日輪王，由3.3仙升上6仙，單日升幅82%，成交量1球，金額5萬5千元，1個散戶已經可以捧起晒。隻輪9月尾夠鐘，行使價62元（正股56.25元），有渣剩嘅機會好細。炒長和系C輪，最好都係揀低溢價而交投旺嗰批，不過唔係𠵱家買，𠵱家係賺錢落袋時候，有低位先至諗。長實同和黃都係喺本月19日派半年成績表，派成績表前如果升得太多，驚住到時會獲利回吐。
新地C輪：新地（016）係撐住個市第3大功臣，收67.50元，有50仙進帳。前日推介嘅C輪9391，收64仙，升5%，兩日夾埋升23%。前日同時提及嘅9977，昨單日升幅18%，呢件槓桿率大過9391。
地產股近期有啲活力，可以睇好，揀C輪炒，但要提防相關正股間中會有回吐，揸唔定主意炒輪，分分鐘震晒啲貨出去。要避免咁嘅情形，最好注碼細啲。新地C輪主角對象仍係9391，不過累升唔細，等多陣，有平貨至買。
章盛